قهوة مرة 1
ارتبك للحظة ووشه جاب ألوان، وبعدين حاول يستعيد هدوءه المزيف تاني، وبصلي وقال بصوت واطي وضعيف بيستعطفني بيه، سلمى… عشان خاطري متخليهمش يدمروا بيتنا ويشمتوا الناس فينا.
ضحكت بمرارة ووجع مالي قلبي وقولتله، بيتنا؟ بيت إيه اللي بتتكلم عنه؟ أنت بقالك تلات سنين بحالهم عايش بحياتين كاملين، بتنام هنا وتصحى هناك، وبتضحك عليا وعليها.
وبعدين بصيت في عينيه وقولتله بهدوء كان أقسى وأوجع من ميت صرخة، البيت ده اتدمر واتهد على اللي فيه، يوم ما أنت قررت تحول مراتك وحبيبتك لقضية مريضة نفسية ومجنونة عشان بس تحمي نفسك وتطلع منها زي الشعرة من العجين.
الصمت رجع سيطر على المكان كله تاني. ومفيش حد نطق غير المحامي بتاعه، اللي حط الملف الأسود تحت باطه وقال باستسلام، أستاذ عمر… أنا شايف إن الأفضل لينا إننا نمشي دلوقتي حالا.
بس عمر متحركش من مكانه. فضل باصصلي فترة طويلة أوي، نظرة كلها غل وحقد، وبعدين قالي، هتندمي يا سلمى، قسما بالله لتندمي.
ولأول مرة من سنين طويلة أوي، محسيتش بأي ذرة خوف من تهديده ده. بصيتله بثبات وقوة وقولتله، يمكن أندم… بس الأكيد إني عمري ما هخاف منك تاني بعد الليلة دي.
وبعدها، قفلت الباب في وشه بكل قوتي.
في صباح اليوم اللي بعده، بدأت الحرب الحقيقية. الموضوع مبقاش مجرد خيانة زوجية أو جواز في السر، دي بقت قضية كاملة متكاملة. بلاغات في الأقسام، محامين رايحين جايين، تفتيش في حسابات بنكية، تسجيلات بتنطق باللي يوجع، ورسايل قديمة كنت بتمنى من كل قلبي إني مشوفهاش ولا أقراها في يوم من الأيام.
اكتشفت الكارثة… اكتشفت إن عمر كان بيصرف على حياته التانية دي كلها من فلوسي أنا. شقة ياسمين، الهدايا اللي كان بيجيبهالها، مصاريف المستشفى وقت ولادتها، وحتى كل قرش اتصرف على ابنه آدم… كل ده كان بيخرج من حساباتي البنكية اللي كنت سايباهاله يديراها وكنت فاكرة إنها مخصصة لاستثماراتنا ومستقبلنا سوا ما كل الفيز معاه وكمان توكيل.
بس كل ده كوم، واللي شفته بعد كده كوم تاني خالص. الصدمة الحقيقية اللي كسرتني بجد كانت الملف اللي ياسمين لقته على اللاب توب بتاعه.
ملف كامل متسمي باسمي. سلمى.
الكاتبة نرمين عادل همام
جوه الملف ده، لقيت صور ليا وأنا منهارة وببكي بهيستيريا بعد ما سقطت وخسرت حملي التاني. لقيت سكرين شوت لرسايل غاضبة ومجنونة كنت ببعتهاله بعد ما يختفي بالأيام وميردش عليا، ومقاطع فيديو ليا وأنا بصرخ وبشد في شعري وقت خناقاتنا الكبيرة.
