حماتي في السوق 2

جرينا بسرعة على البنك أنا وسارة. الطريق كان زحمة والأعصاب مشدودة، وفي السكة اتصلت بيوسف ابني. كان لازم أمهّد له الموضوع من غير ما أكسر فرحته بيومه في الجامعة، بس في نفس الوقت كان لازم يعرف الحقيقة قبل ما أحمد يروح له ويكذب عليه أو يستغله ضدنا.
أول ما يوسف رد، نبرة صوته كانت فرحانة:
— “إيه يا ماما؟ أنا خلصت المحاضرات وراجع، على فكرة أنا جايب الخضار معايا عشان أطبخ زي ما وعدتك!”

حسيت بغصة في حلقي، بلعت ريقي بالعافية وقلت له:
— “يوسف يا حبيبي.. انزل على شقة تيتة في الهرم فوراً، وما تروحش شقتنا خالص النهاردة. لما توصل هناك هفهمك كل حاجة.. أهم حاجة ما تتصلش بأحمد ولا ترد عليه لو كلمك.”

يوسف نبرة صوته اتغيرت واستغرب:
— “في إيه يا ماما؟ بابا أحمد فيه حاجة؟ اتخانقتوا ولا إيه؟”
رديت بحزم:
— “يا يوسف اسمع الكلام، انزل على تيتة حالاً وأنا نص ساعة وهكون عندكم.”

وصلنا البنك قبل الإغلاق بربع ساعة بالضبط. كانت صالة الانتظار تقريباً فاضية. دخلت لمدير الفرع اللي كان عارفنا أنا وأحمد كويس، لأننا فتحنا الحساب المشترك عنده من سنين وكنت بانتظام بحوّل جزء من مرتبي ومكافآتي للحساب ده.

مدير الفرع رحّب بينا، بس أول ما شاف المحامية سارة ومعايا صور التحويلات والمحادثات، وشّه اتغير.
سارة قعدت وقالت له بصوت واطي وبمنتهى الثبات:
— “يا أستاذ، موكلتي الأستاذة مريم مكتشفة تصرفات غير قانونية بيقوم بيها زوجها. الحساب المشترك سُحب منه جزء كبير بدون علمها وفي ظرف ساعات قليلة، والفلوس أتحولت لحساب والدته سعاد في نفس الفرع هنا. أحنا بنقدم طلب رسمي للتحفظ على المتبقي في الحساب المشترك، وبنبلغ بوجود شبهة استيلاء على أموال.”

مدير الفرع بص في الكمبيوتر، وبعدين بص لي وقال بأسف:
— “يا أستاذة مريم.. أستاذ أحمد كان هنا من ساعتين بالضبط، وسحب المتبقي في الحساب المشترك نقداً! الحساب المشترك حالياً مفيش فيه حاجة.”

نزل الخبر عليا زي المية الساقعة. سحب المليون جنيه الباقية نقداً ومشي!
سارة ما اتفاجأت وكررت سؤالها بذكاء:
— “طب والحساب الثاني اللي باسم سعاد؟ الفلوس اللي أتحولت له من الحساب المشترك الأسبوع اللي فات لسه موجودة ولا اتسحبت؟”

المدير تردد وقال:
— “أنا ما أقدرش إديكي تفاصيل حساب عميل ثاني، دي سرية حسابات..”
سارة طلعت كارتها وقالت له:
— “لو الفلوس اتسحبت بعد ما وريتك أدلة التحويلات المشبوهة دي، والإنذار اللي هسلمك صورة منه حالاً، البنك هيكون طرف في الدعوى القانونية بتهمة التستر والتسهيل. التحويلات طالعة من حساب موكلتي المباشر لحساب أمه بدون وجه حق وبدون عقد تجاري بينهما.”