مراتي طلبت الطلاق

مراتى طلبت الطلاق علشان عرفت إني اتجوزت عليها، وسابت بنتها عمرها 5سنين. وامبارح وأنا راجع من الشغل شوفتها مع زميلها وكان ماسك إيدها، وبيضحكو ويهزرو عرفت واتأكدت إنها اتخطبت في نفس الشهر اللي اتطلقت فيه، وفرحهم بعد انتهاء العده. إزاي لحقت تتخطب وهي لسه في شهور العدة؟ هو لحق يخطبها كده بسرعة؟ أكيد كانوا بيتكلموا مع بعض وهي على ذمتي ومش من حقها تتخطب وهى فى شهور العده انا لازم افشكل الخطوبه دى باى طريقه **الجزء الأول** أنا مش قادر أصدق عيني.. الدنيا بتلف بيا، والدم غلي في عروقي لدرجة إني حسيت إن نفوخي هيطير! واقف في نص الشارع زي التايه، باصص عليهم من بعيد ومش قادر أتحرك من صدمتي. الحكاية بدأت من شهر واحد.. شهر واحد بس! لما عرفت إني اتجوزت عليها، الدنيا اتقلبت ومقعدتش. صرخت ولمت عليا أمة لا إله إلا الله، وطلبت الطلاق وفضلت تصرخ لحد ما نفذت لها رغبتها وطلقنا. مأثرش فيها حتى دموع بنتها "ليلى" اللي عندها 5 سنين.. سابت البنت وهي بتبكي وتتأملها، ومشيت ومصممة على خراب البيت. قلت ماشي، حقها تزعل وتغضب، بس اللي حصل امبارح دمر كل خلية عقل في راسي. كنت راجع من الشغل هلكان، وفي طريقي شوفتها.. أه والله شوفتها! واقفة مع "مدحت" زميلها في الشغل.. الراجل اللي ياما كانت تقول عليه "دا زي أخويا يا أحمد ومحترم جداً". كانوا واقفين قدام محل عصير، وكان ماسك إيدها وهي بتضحك من قلبها وتهزر معاه، الضحكة اللي بقالي سنين مشوفتهامش على وشها! فضلت وراهم من بعيد لبعيد وعيني مكسورة وقلبي قايد نار، لحد ما شوفتها داخلة معاه محل صاغة.. صاغة! يعني لسه مطلقة مكملتش شهر، ولحقت تتخطب؟ وفرحهم بعد العدة على طول؟! إزاي وبأي حق؟ هي مش لسه في شهور العدة يعني شرعاً ودينًا على ذمتي ومينفعش حتى يتقال لها كلمة إعجاب؟ النار قادت في قلبي وعرفت متأخر.. أكيد كانوا على علاقة، أكيد كانوا بيتكلموا وهي على ذمتي وفي بيتي، وبتغفلني! الغدر جه من الست اللي أمنتها على اسمي وبنتي. رجعت البيت والبنت نايمة، فضلت ألف في الصالة زي المجنون. الأفكار السودا بتجيبني وتوديني. أنا مش هسكت.. مش هسيبها تفرح ولا تتهنى، ولازم أفشكل الخطوبة دي بأي طريقة وأكسر مناخيرهم هما الاتنين زي ما كسروني وداست على كرامتي وسابت بنتها. أول حاجة عملتها، مسكت التليفون وكلمت "سيد"، صاحبي الأنتيم اللي شغال معاهم في نفس الشركة.. * "أيوة يا سيد.. عايزك في مصلحة لله، لو ليا خاطر عندك متقولش لأ." سيد رد عليا بقلق: "في إيه يا أحمد؟ صوتك ماله؟" * "عايز كل الكواليس بتاعة مدحت وطليقتي.. كان إيه بيحصل ورا ضهري في الشغل؟ ومن امتى المحروس حاطط عينه عليها؟" سيد سكت شوية، والسكوت دا أكد لي الشكوك.. قال لي بصوت واطي: "يا أحمد يا اخويا، بلاش تفتح في القديم، اللي حصل حصل وهي خلاص خرجت من حياتك." زعقت في التليفون: "ورحمة أبويا ما هسيبها! انطق يا سيد، البت اتخطبت له وهي لسه في العدة، يعني كانوا مأرتلني وأنا نايم على وداني!" سيد اتنهد وقال: "بصراحة يا صاحبي.. مدحت كان هيموت عليها من زمان، ومن يوم ما عرف إنك اتجوزت عليها، وهو مبقاش يفارقها، وكان بيشحنها ضدك ويقولها اطلقي وأنا أشيلك في عيوني.. وهي شكلها وافقت من أول دقيقة." قفلت السكة مع سيد، والشرارة خلاص عمت عيني. رتبت كل حاجة في دماغي.. طالما لعبتوا في الضلمة، يبقوا تستحملوا بقى اللعب على المكشوف. تاني يوم الصبح، لبست ونزلت على الشركة عندهم.. مش هعمل شوشرة في المكاتب، لأ، أنا هضرب ضربة توجع وتخرب الجوازة دي من أساسها. وقفت مستني مدحت لما ينزل يشتري فطار لوحده، وأول ما لمحته في الممر الضلمة اللي ورا الشركة، سحبت خطوتي بسرعة ووقفت في وشه.. مدحت اتصدم وألوانه خطفت، ورجع خطوة لورا وقال بتلعثم: "أحمد؟ أنت إيه اللي جابك هنا؟" #الكاتب_رومانى_مكرم قربت منه وابتسمت ابتسامة رعب، وحطيت إيدي على كتفه وضغطت جامد وقلت له بصوت فحيح الأفاعي: "جاي أبارك يا عريس.. مش عيب برضه تخطب مراتي وهي لسه في عدتها؟ بس قولي.. هي مقلتلكش على السر الكبير اللي مخبياه عن الكل؟" مدحت بربش بعينه بزهول وخوف: "سر؟ سر إيه؟" > مدحت بربش بعينه بذهول وخوف: "سر؟ سر إيه؟" ضحكت بسخرية ولفت دراعي حوالين كتفه وكأننا أصحاب، وميلت على ودنه وقلت بصوت واطي: "مقلتلكش إنها مريضة شك وبتحب تلم الناس حواليها بالدراما؟ ولا مقلتلكش إن بنتها ليلى سابتها بكل قسوة ورفضت تاخدها معاها علشان تفضى لك؟ الست اللي تبيع بنتها اللي عندها 5 سنين عشان تمشي ورا كلامك وشحنك ليها، تفتكر مش هتيجي في يوم وتبيعك أنت كمان لأول واحد يبتسم لها؟" مدحت وشّه جاب ألوان، وحاول يشيل إيدي من على كتفه وهو بيقول بعصبية مكتومة: "أحمد، الزم حدودك! هي طليقتك دلوقتي، وأنا مدخلتش بيتك وهي على ذمتك، هي اللي جتلنا الشغل منهارة بعد ما عرفت إنك اتجوزت عليها وكسرت قلبها، وأنا كل اللي عملته إني وقفت جنب زميلة في محنتها!" شديت على كتفه أكتر وقربت وشي من وشّه: "وقفت جنبها؟ بالسرعة دي؟ صاغة وخطوبة وفرح بعد العدة عل طول؟ دي اسمها غفلة يا مدحت، كنتوا بترتبوا لكل ده وهي لسه بتطبخ في بيتي وبتغسل هدومي. بس أنا مش هسيبكم تتهنوا.. والسر اللي جاي هيهد المعبد على دماغكم انتوا الاتنين." سيبته ودفعت كتفه لورا بعنف، ومشيت وأنا سامع أنفاسه المتلاحقة وخوفه اللي مالي الممر. خرجت من الشركة والدموع محبوسة في عيني من القهر، بس النية خلاص اتعقدت على الخراب. رجعت البيت، لقيت أمي قاعدة مع ليلى بتأكلها، ليلى بصت لي بعيونها الدبلانة وقالت: "بابا.. هي ماما مش هتيجي تاخدني نشتري لبس؟" الكلمة نزلت على قلبي زي السكين، نزلت لمستواها وبست راسها: "ماما مسافرة يا ليلى، وأنا معاكي ومش هسيبك أبدًا." دخلت أوضتي، وطلعت التليفون.. النطرة اللي شوفتها في عين مدحت عرفتني إنه بدأ يشك، والراجل لما يدخل الشك في قلبه من ناحية ست، الموضوع بينتهي. كلمت "سيد" تاني. * "سيد.. عايزك تعرف لي هما هيتقابلوا فين النهاردة بعد الشغل، وعايز رقم تليفون والد مدحت." سيد رد بخوف: "أحمد، هتعمل إيه؟ بلاش فضايح في الشركة الله يخليك، أنا أكل عيشي هنا." * "متخافش يا سيد، برا الشركة خالص.. أنطق، هيروحوا فين؟" سيد اتنهد وقال: "سمعتها بتقوله إنهم رايحين يقابلوا أهله في كافيه على النيل الساعة 7 عشان يتفقوا على تفاصيل الفرح." ابتسمت بشر.. دي الفرصة الجاتلي لحد عندي. الساعة جت 7:30، وصلت الكافيه، وقفت بعيد ورا شجرة كبيرة وبصيت.. كانوا قاعدين، مدحت ووالده ووالدته، وهي قاعدة وسطهم لابسة فستان شيك وبتتكلم بمنتهى الرقة والخجل المزيف. أخدت نفس طويل، وعدلت قميصي، ومشيت بخطوات ثابتة وواثقة لحد ما وصلت لتربيزتهم.. أول ما لمحتني، الفنجان وقع من إيدها واتكسر على الأرض، ووشها بقى زي الأموات! وقفت فوق راسهم وقلت بصوت عالي سمعه كل اللي حوالينا: "مساء الخير يا جماعة.. مبروك يا عريس، بس مش كنتوا تعزموني على قراية فتحة مراتي؟!" #الكاتب_رومانى_مكرم طليقتي وقفت من طولها وهي بتترعش، وصوتها طلع بالعافية: "أحمد؟! أنت إيه اللي جابك هنا؟ أنت عايز مني إيه تاني؟ مش طلقنا وخلاص!" والد مدحت قام وقف وهو راجل كبير في السن، وبصلي بحدة وقال: "جرى إيه يا فندي؟ أنت مين؟ وبأي صفة بتدخل وتقول الكلام ده؟" ابتسمت ببرود وقعدت على كرسي فاضي كان على التربيزة اللي جنبهم، وحطيت رجل على رجل وبصيت لوالد مدحت وقلت له: "أنا مين؟ أنا جوز الست المصونة اللي قاعدة قدامك دي.. قصدي طليقها اللي لسه مكملتش شهر من يوم ما انفصلنا، يعني الست اللي ابنك جاي يخطبها ويقعد معاها في كافيه، لسه شرعاً ودينًا في شهور العدة ومتحرمة عليه وعلى غيره!" والدة مدحت شهقت وحطت إيدها على بقها وبصت لطليقتي بذهول: "عدتها؟! أنتِ مش قلتي لمدحت إنك مطلقة من شهور والعدة خلصت؟!" طليقتي وشها بقى يجيب ألوان، وبصت لمدحت وهي بتعيط وبتترجاه: "مدحت متصدقوش.. ده كداب وجاي يخرب حياتي عشان ينتقم مني.. أنا طالعة من بيته بقالي كتير!" قمت وقفت وقربت من والد مدحت وطلعت تليفوني، وفتحت وثيقة الطلاق الرسمية اللي متصورة على الموبايل ووريتها له: "اتفضل يا حاج.. شوف التاريخ بنفسك، الطلاق ملوش غير أسابيع قليلة. يعني ابنك المحترم بيخطب ست وهي لسه في عدتها، وده في شرع ربنا باطل ومينفعش. مش بس كده.. الست اللي ابنك هيموت عليها دي، سابت بنتها اللي عندها 5 سنين بتبكي وراحت تدور على الصاغة والفساتين!" والد مدحت وشه اسودّ من الغضب، وبص لابنه وزعق بعلو صوته في الكافيه: "الكلام ده صحيح يا مدحت؟ أنت كنت عارف إنها لسه في العدة وجايبنا نخطبها؟!" مدحت كان واقف مصدوم، الشكوك اللي زرعتها في دماغه الصبح مع كلامي دلوقتي خلته يبص لطليقتي بنظرة غريبة.. نظرة واحد حاسس إنه اتخدع. قال بصوت متلعثم: "يا بابا.. هي قالت لي إن الأمور منتهية بينهم من زمان.. أنا.." والد مدحت قاطعه بقسوة وضرب التربيزة بإيده: "الموضوع ده ينتهي حالاً! إحنا ناس بنعرف الأصول وبنخاف من ربنا، ومندخلش بيوت من أبوابها وهي لسه مقفولة بشرع الله.. يلا بينا!" أم مدحت قامت بسرعة وهي بتبص لطليقتي بقرف، ومدحت وقف عاجز ومشلول مش عارف يدافع عنها ولا يواجه أبوه، وبص لطليقتي بكسرة وقال لها: "أنتِ كدبتِ عليا يا سماح.. كدبتِ في أهم حاجة!" وسابها ومشي ورا أهله. طليقتي قعدت على الكرسي وهي بتنهار وتعيط بهستيريا، والناس في الكافيه كلها كانت بتبص عليها وبتتوشوش. قربت منها وميلت عليها وقلت لها بصوت واطي وشماتة مصلية: "دي أول خطوة.. زي ما هنتي كرامتي وسِبتِ بنتك عشان تجري وراه، أديكي خسرتيه وخسرتِ نفسك قدام أهله.. وال جاي أسوأ." سيبتها وخرجت من الكافيه وأنا حاسس إن ناري بردت شوية، بس وأنا ماشي في الشارع تليفوني رن.. كان رقم غريب، فتحت الخط وجالي صوت راجل غامض بيقول لي: "فاكر نفسك انتصرت يا أحمد؟ اللي عملته النهاردة في الكافيه هتدفع تمنه غالي أوي.. وبنتك ليلى مش هتشوفها تاني!" #الكاتب_رومانى_مكرم الخط قطع، والدنيا اسودت في عيني أكتر م الصدمة الأولى! الصوت كان حاد وفيه نبرة غل مش طبيعية. مسكت التليفون وأنا إيدي بتتأرش كأني ماسك حتة تلج، وحاولت أتصل بالرقم تاني.. "هذا الرقم غير متاح حالياً". نزلت جري في الشارع زي المجنون، مش شايف قدامي، العربيات بتزمرلي وأنا بعدي الطريق ومنطقتش ولا كلمة غير اسم واحد: "ليلى!". ركبت أول تاكسي وقابلني، وقلت له وعيني طالع منها شرار: "سوق بأقصى سرعة عندك يا أسطى، بيتي بيخرب!". طول الطريق والأفكار السودا بتاكل في عقلي. مين ده؟ وليه ليلى بالذات؟ هل مدحت لحق يرتّب لحاجة بالسرعة دي؟ ولا سماح هي اللي ورا الموضوع وعايزة تلوت ذراعي بعد ما فضحتها قدام أهل العريس؟ وصلت البيت، طلعت السلم تلاتات تلاتات، وبقيت أرزع على الباب بكل قوتي. أمي فتحت وهي مخضوضة: "في إيه يا أحمد؟ مالك يا ابني بتنهج كدا ليه؟" دخلت عيني بتدور في الصالة زي الرادار: "أمي.. ليلى فين؟ ليلى جوة؟" أمي ردت باستغراب: "ليلى نايمة جوة في أوضتها يا ابني من ساعة ما دخلت، جرى إيه؟" جريت على الأوضة وفتحت الباب.. ليلى كانت نايمة في سريرها الصغير، ملاك بريء مش دريان بالحروب اللي بتطحن فينا برة. أخدت نفس طويل ودموعي نزلت غصب عني، قعدت جنبها وبست إيدها الصغيره وضميتها لصدري وأنا بحلف في سري إني مش هسمح لمخلوق يمس شعرة منها. خرجت لأمي وحاولت أهدي نفسي عشان متتخضش، وقلت لها تقفل الأبواب كويس وم تفتحش لأي حد مهما كان. قعدت في الصالة، والتليفون في إيدي مش بيفارقني. الساعة بقت 2 بعد نص الليل، وكنت خلاص هبدأ أحس إن المكالمة كانت مجرد تهديد فاشل أو لعبة أعصاب.. لحد ما التليفون نوّر ورنت رسالة "واتساب" من نفس الرقم الغريب. فتحت الرسالة.. كانت صورة! صورة لـ "ليلى" وهي نايمة في سريرها دلوقتي حالا! ومتصورة من شباك الأوضة اللي بيطل على المنور! وتحت الصورة مكتوب: "المرة دي تصوير.. المرة الجاية هناخد الأمانة. لو عايز بنتك تفضل في حضنك، بكرا الساعة 10 الصبح تكون عند بيت أهل سماح، وتعتذر لمدحت وأبوه قدام المنطقة كلها، وترجع لسماح وتكتب لها مؤخر وعقد جديد باللي هي تطلبه.. وإلا، اعتبر ليلى مأخدتش غير 5 سنين بس من عمرها." جسمي كله سقع. الشباك! بصيت بسرعة على شباك الأوضة ولقيته موارب سنة صغيرة. طلعت بلكونة البيت وبصيت في المنور ملمحتش حد، المجرم صورها وهرب في الضلمة. الشك بدأ ينهش فيا.. مدحت؟ لأ، مدحت جبان وأبوه راجل بتاع أصول وطرد سماح. أكيد سماح استعانت بحد من قرايبها الصيع عشان يهددوني، أو يمكن هي اللي باعتة البلطجي ده عشان تكسرني وترجع البيت شروطه هي وتنتقم لكرامتها اللي اتعجنت في الكافيه. الدموية عمت عيني، ومبقاش في عقلي مكان للخوف. مسكت التليفون وكتبت رد على الرسالة: "الميعاد بكرا الساعة 10.. وأنا هاجي، بس افتكروا كويس إن اللي بيلعب مع ديب، بيبقاش خايف على عمره." قضيت بقية الليلة صاحي، حاطط كرسي ورا باب الأوضة وعيني على الشباك، والنار بتاكل في صدري. الصبح طلع، لبست هدومي، ونزلت وعيوني حمرا من قلة النوم ومن الغضب. وصلت لشارع أهل سماح الساعة 10 بالدقيقة. الشارع كان هادي، بس أول ما قربت من بيتهم، لمحت عربية مدحت واقفة على جنب، ولمحت سماح واقفة في البلكونة وباصة لي بنظرة كبرياء وشماتة، وجنبها واقف راجل ضخم، حاطط إيده في جيبه وبيبص لي وهو بيضحك.. الراجل ده أنا عارفه كويس! #الكاتب_رومانى_مكرم الراجل ده كان "حامد"، ابن عم سماح الكبير.. صايع مسجل خطر وياما دخل في مشاكل، ومن زمان وهو كان عينه منها قبل ما تتجوزني، وعرف أزاي يستغل الفرصة عشان يظهر في الصورة ويلوي دراعي بالتهديد رغبة في الفلوس اللي سماح وعدته بيها من المؤخر الجديد. نزلت سماح من البيت ومعاها حامد، وفي نفس الوقت كانت عربية مدحت بتفتح ونزل منها هو وأبوه اللي جم بطلب من حامد عشان يشوفوا "رد شرف" سماح زي ما فهمهم. الجيران بدأت تتجمع في الشارع، والكل واقف مستني يشوف أحمد اللي كان مكسور هينفذ الشروط أزاي. حامد قرب مني وبثقة وعين قوية قال: "نورت يا أبو ليلى.. ها، فكرت كويس في الكلام اللي دار بيننا بالليل؟ ليلى غالية برضه ومينفعش تغيب عن حضنك." مدحت وأبوه كانوا واقفين بعيد، مدحت بيبص لي بنظرة تشفي، وسماح واقفة ورا ابن عمها ورافع راسها لفوق بكل كبرياء ومستنية لحظة انكساري واعتذاري. قربت من حامد، وبمنتهى الثبات والبرود اللي في الدنيا، طلعت تليفوني وضغطت على زرار التشغيل وفتحت الاسبيكر.. فجأة، طلع صوت من التليفون، بس مش صوت تهديد، ده كان صوت "سيد" صاحبي وهو بيتكلم مع ظابط المباحث في القسم ومعاهم القوة وبيدخلوا بيت أمي عشان يأمنوا المكان، وصوت ظابط تاني بيرد في اللاسلكي: "يا أحمد بيه، القوة مسكت الواد اللي كان بيراقب البيت من المنور وهو نازل، واعترف بكل حاجة وبالمكالمة والصورة اللي بعتها، واعترف على حامد ابن عم طليقتك!" وش حامد اتقلب 180 درجة، وألوانه خطفت والضحكة ماتت على وشه. سماح رجعت خطوة لورا وهي بتترعش، ومدحت وأبوه بصوا لبعض بصدمة. قلت لحامد وأنا ببتسم وبحط التليفون في جيبي: "فاكرني عبيط وهسيب بنتي في خطر لحد الساعة 10 الصبح؟ من ساعة ما الرسالة وصلتني وأنا مكلم رئيس المباحث، وبلاغ التهديد بالق-تل والخطف وتصوير القصر متسجل.. والواد صبيك وقع، وأنت دلوقتي مطلوب في القسم بتهمة جناية خطف وابتزاز!" مكملتش الكلمة، ولقينا بوكس الشرطة داخل الشارع بسرعة ووقف قدام البيت بالظبط. أمين الشرطة نزل ومعه العساكر وشاور على حامد وسماح: "هما دول يا فندم.. هاتوا حامد وسماح أحمد للقسم فوراً بطلب من رئيس المباحث!" حامد حاول يجري، بس العساكر قفلو عليه الطريق وكلبشوه في ثانية وسط ذهول وصدمة كل أهل المنطقة والجيران اللي بقوا يتوشوشوا ويدينوهم. وسماح بدأت تصرخ وتعيط ودموعها تسيل وهي بتتبهدل وتتركب البوكس قدام الناس كلها اللي كانت جاية تتفرج على انكساري أنا. بصيت لمدحت وأبوه اللي كانوا واقفين مشلولين من الكارثة، وقلت لوالد مدحت: "أظن دلوقتي شوفتوا حقيقتها وحقيقة أهلها بنفسكم.. الست اللي تخطط لخطف بنتها عشان الفلوس والانتقام، متستاهلش تكون أم ولا زوجة." والد مدحت تف في الأرض وبص لابنه وقال له: "الحمد لله إن ربنا نجدنا منها ومن قرفها.. يلا من هنا." وسابوا الشارع ومشيوا وعمرهم ما هيرجعوا تاني. ركبت عربيتي ورجعت بيتي، جريت على أوضتي وحضنت ليلى اللي كانت صاحية وبتلعب، ودموعي نازلة من الفرحة.. البيت هدي، والنار اللي كانت قايدة في قلبي انطفت بالعدل والقانون. خسرت ست مكنتش تصون الاسم ولا البيت، بس كسبت بنتي وكسبت كرامتي اللي دمرت شرهم في النهاية. #الكاتب_رومانى_مكرم

مقالات ذات صلة

ليبيا منذ قليل

سبب إغتـ,ـيال الزعماء الثلاثة

مراتي جالها مرض

صاحب محل الدهب

موعد وقفة عرفات وعيد الأضحى 2025 وفق الحسابات الفلكية

رجعت من سفرية شغل

اترك تعليقاً إلغاء الرد